初八 (Uncle B上海週記)

Uncle B | 14th Sep 2007 | 一般 | (324 Reads)

平均分: 10.00 | 評分人數: 1

我曾經同自已講過,如果有一日,遇上一隻不問情由就跟我返屋企嘅流浪貓,一定係我哋有一筆前世未算清嘅悵,不論誰欠誰，我就一定要收養佢…上星期六,屋企樓下,成日喺我視線範圍跑過嘅流浪貓,今次徘徊喺我脚下,叫佢跟我走,佢又竟然肯,所以忍唔住抱佢返屋企，其實我都唔知點解抱佢返屋企，又唔係打算養佢，（其實閃過抱佢返屋企養嘅念頭，但係一隻動物嘅一生唔應該係我一時衝動而決定）

好彩屋企有買比初八嘅手信,起碼我可以請佢食餐唔錯嘅宵夜！睇慣初八高貴優雅，氣定神閒嘅食相，驚呀原來貓都有甘狼吞虎嚥嘅一面，唉，就知佢好餓！！對陌生環境充滿好奇嘅流浪貓，識得自已去窗口睇街，食完唔夠飽識得自已去廚房等…咁聰明嘅小動物,真係好想說服自已收留佢.一頓豐富嘅宵夜後,我只可以送佢返去樓下嘅花園(佢成日出沒嘅地方),推開大門,小動物一溜煙走到樓梯口(啊!原來你都好想走,我心想), 一手抱起佢,一面行落樓梯,佢就一面掙扎… (等多陣行到花園我就放低你啦) 行到花園一放手,佢又一溜煙跑走,跑去我往嘅大厦電梯大堂門口徘徊… (你等我?我唔可以養你,我可以請你食飯,可以同你玩…)